Студенттер үчүн ментордук долбоор

Башталышы: 15.01.2022
Долбоордун жетекчиси: Канат Ишенбек, Мумтозбек Музаффаров
Долбоор ишке ашчу жер: Германия
Долбоор тууралуу: БИЗ фонду Германияда окуган кыргызстандык студенттер жана ошондой эле кесиптик билим алып жаткандар үчүн менторлук долбоорун баштайт. Бул долбоордун алкагында Германияда иштеген адистер ментор катары жеке тажрыйбаларыбыз менен бөлүшүп, студенттерге ар түрдүү иш-чаралар аркылуу колдоо көрсөтүп, окууну ийгиликтүү аяктоого жардамдашмакчыбыз. Долбоор боюнча кыргыз, орус жана немис тилиндеги жарыяны окуп, биринчи жолугушууну биздин You-Tube-Каналдан көрүп алыңыз.

«Au-Pair Mentoring» долбоору

Башталышы: 10.01.2022
Долбоордун жетекчиси: Айканыш Рыскулова, Касиет Асекова, Мунара Азимбекова
Долбоор ишке ашчу жер: Германия
Долбоор тууралуу:
Германияда көп жылдар бою жашаган мекендештерибиз «Au-Pair Mentoring» долбоору аркылуу Au-Pair программасынын катышуучуларына устат катары жардам беришет. Устаттарды жана шакирттерди сурамжылоо анкетасы аркылуу Au-Pair Community тандап алат. Устат – шакирт тандеми эки тараптын жеке жана кесиптик кызыкчылыгына жараша түзүлөт. Ошондой эле долбоор жүрүп жаткан учурда түрдүү тренингдер жана мамилелерди түзүүгө жана чындоо арналган иш-чаралар пландалган. Долбоордун кыргыз жана орус тилиндеги жарыясын окуп, биринчи жолугушууга катыша албай калган болсоңор, ментор менен байланышка чыгыңыздар.
Ментордук долбоордун максаты: Германиядагы жаштарыбызга жеке жана кесиптик максаттарына жетүүдө консультативдик көмөк көрсөтүү.

«Чырак» долбоорууна колдоо акциясы

Башталышы: 01.01.2022
Долбоордун жетекчилери: Др. Махабат Садырбек, Асел Сайраан-Дамир, Азамат Токтакунов
Долбоор ишке ашчу жер: Кыргызстан
Долбоор тууралуу:
БИЗ уюму Кыргызстандагы «Чырак» долбоорууна көмөк көрсөтүүнү максат кылат. Бул  долбоор кыз-келиндерге санариптик билим берүү үчүн дүйнөнүн чар тарабындагы кыргызстандык IT-адистери тарабынан иштелип чыккан. Биздин уюм бул долбоор үчүн декабрь айында баштапкы каражатты чогултуудагы IT Classica аттуу кайрымдуулук концертине көмөк көрсөткөн: Швейцариядан БИЗ уюмунун өнөктөшү«Кыргызстанга көпүрө» менен биргеликте чогулган каражатка Орловкадагы балдар үйүнүн 22 тургунун, Петровскийдеги психоневрологиялык санаторийдин 15 бейтабын жана 5тей тарбиячыны автобус менен концертке алып келип, кайра жеткирүү мүмкүнчүлүгүн түзүшкөн.
Чырак долбоорундагы окуу курсу 3 айдан 5 айга созулат жана катышуучуларга информатиканын негизгин, программалоонун жана код жазуунун башкы тилдерин үйрөтүүнү максат кылат. Миңдеген жаштарга үлгү болгон, кыргыздын белгилүү айтишниктери бул курска ментор катары кызмат кылышат. Бул долбоорго 3000 ден 5000ге чейин кыз-келиндер катыша алат. Алар ар кандай жашоо шартында жашагандыктан, мүмкүнчүлүктөрү жана ресурстары чектелүү болгондуктан, аларга материалдык жардам керек. Ошондуктан урматтуу чет жерлерде, айрыкча Европа өлкөлөрүндө жашап жана иштеп жүргөн жердештер, силер бул жердеги техникалык жабдуулардын стандартын, аларды белгилүү бир мөөнөттө жаңылануусун жана алардын таштандыга кеткендеги чыгашасы тууралуу кабардарсыңар. Эгерде өзүңөр эмгектенген институттарда, мекемелерде жана компанияларда колдонулган нотбуктарды алуу мүмкүнчүлүгүн байкасаңар жана аларга кайрылуу жасагыңар келсе, биз силерге көмөк көрсөтүүгө даярбыз. Силерден өтүнүч: кыргызстандагы жердештерибиз жана алардын келечеги үчүн ушундай учурлардан пайдаланып, болгон аракетибизди жумшасак. Бир кезде «Бир адамдан бир дивайс» деп башталган демилгени эми «Чырак» билим берүү программасы үчүн улантсак жана бул долбоорго ар тараптан көмөк көрсөтсөк. Долбоордун жетекчилери тиешелүү расмий кагаз-документтерди берүүгө даяр. Биз жиберген ноутбуктар менен миңдеген жердештер билим алып, долбоорлорду аткарып, өздөрүнө жаңы ноутбук сатып алып, артканын кийинкилерге бергенге макул. Эгерде бул долбоорду каражат менен колдогуңар келсе, анда аны „BIZ e.V.“ уюмунун PayPalдогу жана банктагы эсеп дареги аркылуу ишке ашырсаңар болот. Биз уюмдун атынан дагы кайрылууларды жасайбыз, силердин каражат биз тапкан нотбуктарды Кыргызстанга жөнөтүү үчүн сарпталат. Биз силердин колдооңорго, тилектештигиңерге жана билим алдында биригип, билим менен өнүгүү максатыңарга терең ишенебиз.

Айымдардан айымдарга

Башталыш: 08.03.2021
Долбоордун жетекчиси: Ак-Бермет Богачиева, Нурзада Макеева
Долбоор ишке ашчу жерлер: Германия/Орусия/Америка/Түркие/Кыргызстан
Долбоор тууралуу:
Бул  долбоор ар кайсыл өлкөдөгү айымдардын уюмдар менен жана айым активисттердин арасында нетворкиң пайда кылууну көздөйт. Долбоордун максаты: Айымдар арасында байланыш түзүү жана келечекте долбоорлорго колдоо көрсөтүү жана биргеликте иш-аракеттерди ишке ашыруу менен кыргыз коомунун өнүгүүсүнө салым кошуу. Жолугушуулар жана форумдар аркылуу пикир алмашуулар болот. Айымдар ар кандай иш-чаралардын негизинде бири-бири менен маданий, адабий, музыкалык тажрыйба алмашууларга ээ болушат.

Балдар үчүн кыргыз тил сабагы

Башталышы: 01.10.2020
Долбоордун жетекчилери: Динара Сулайманова, Айпери Отунчиева, Айнагүл Мамырбаева
Долбоор ишке ашчу жер: Германия/Швейцария/Kыргызстан
Долбоор тууралуу: Биз Германияда жашап жүрүп эмоционалдык жана руханий жактан өз мекенибиз менен байланышта экенибизди жогоруда айтып өттүк. Аны менен бирге, кыргыз тилин балдарыбызга улуттук баалуу байлык катары өткөрүп берүү зарылдыгын сезип жатабыз. Ошол себептен, балдар жана өспүрүмдөр үчүн «Кыргыз тил сабактары» деген эң алгачкы долбоорубуз бир жылдан бери ийгиликтүү иштеп келе жатат.

Баткен үчүн жардам

Башталышы: 01.03.2021
Долбоордун жетекчилери: Азамат Токтакунов, Махабат Садырбек, Баатыр Алымкулов
Долбоор ишке ашчу жер: Кыргызстан-Баткен
Долбоор тууралуу: 2021-жылдын апрель айында кыргыз-тажик чек арасында кандуу кагылышуу болуп өттү. Үйлөр, мектептер жана дүкөндөр өрттөлүп, жүздөгөн адамдар жаракат алып, миңдеген айыл тургундары үйлөрүн таштап, башка жерде баш калкалоого мажбур болушту. БИЗ уюму өзгөчө кырдаалга карата бир нече пунктан турган жардам акцияларын уюштурду: 1) Жардамга муктаж адамдар үчүн каражат топтолду. 2) Психологиялык жактан жабыр тарткандар үчүн атайын  жардам-сайты түзүлдү. 3) Эл-аралык медианын көңүлүн тартуу максатында Германиянын чоң-чоң шаарларында кыргыз диаспорасы тынчтык митиңгдерин уюштурду. Буга Америка, Италия, Орусия жана Түркиеден жердештер кошулушту. 4) Дүйнөнүн ар кайсыл жеринде эмгектенген активисттердин атайын видео кайрылуусу жаратылды.
Биздин каражат топтолгондо, Баткенде кайрадан тынчтык орноп, тургундарга ар тараптан жардамдар берилди. БИЗ уюму өнөктөшү «Элим, барсыңбы?» кайрымдуулук фонду жана Кореядагы мекендештер менен биргеликте Лейлек жана  Баткен районундагы 9 мектепке 20 класстык компьютер, 20 проектор, 20 акылдуу доска жана 700 даана окуу китептерин тапшырды. Ал мектептерге төмөнкүлөр кирет: 1) Арка айылындагы Арка мектеби, 2) Достук айылындагы Достук орто мектеби, 3) Жаштык айылындагы №3-Гимназия, 4) Максат айылындагы Максат орто мектеби, 5) Кулунду айылындагы №2-Гимназиясы, 6) Кулунду айылындагы T. Жолдошев орто мектеби, 7) Орто Боз айылындагы Орто Боз мектеби, 8) Ак-Сай айылындагы Ак-Сай мектеби жана 9) Кара-Бак айылындагы Суу Бою Кара-Бак мектеби. Бул боюнча тартылган атайын видеону көрүңүздөр.

Пандемияга каршы күрөш үчүн колдоо

Долбоордун мөөнөтү: 15.07.2020-15.09.2020
Долбоордун жетекчилери: Асел Сайраан-Дамир, Азамат Дамир, Уран Камчыбеков
Долбоор ишке ашкан жер: Кыргызстан
Долбоор тууралуу: Ковид-19 дун биринчи толкуну Кыргызстанга жеткенде, БИЗ уюму жардам акциясын ишке киргизди. Көптөгөн жердештер бир айдын ичинде 9.876,53 евро топтошту. Бул акчага биздин уюм дем-алдыруучу жабдыктарды, ооруканаларга керектүү шаймандарды, төшөнчү-жууркандарды жана дары-дармектерди алды. Алынган оокаттар тезинен Кыргызстанга жиберилди. Аларды БИЗ уюмунун Кыргызстандагы өнөктөшү «Элим, барсыңбы?» кайрымдуулук фонду Талас, Нарын, Баткен, Жалал-Абад, Нарын, Талас жана Ысык-Көлдүн борбордук ооруканаларына жеткирип берди. Дагы чогулган 1.721,32 еврого Бишкек калаасындагы ооруканаларга 3 кардиографиялык, 3 дем алдыруучу аппарат жана тез жардамга зарыл жабдыктар, андан тышкары компьютер, принтер сыяктуу дагы керектүү буюмдар алып берилди. Чогулган каражат жана берилген жардамдар тууралуу биз Facebook баракчабызда деталдуу түрдө баяндап бердик. Дагы маалыматтар төмөнкү 1-видеодо, 2-видеодо жана 3-видеодо камтылган.