Долбоорлор

Баткендеги «Айымдар үчүн футбол турнири»

Долбоордун мөөнөтү: Ар жыл сайын жайында
Долбоордун жетекчиси: Газбүбү Бабаярова
Долбоор ишке ашчу жер: Баткен (Кыргызстан)
Долбоор тууралуу: Газбүбү Бабаярова – Чехиянын Прага шаарында жашаган көрүнүктүү активисттердин бири. Ал көптөгөн жылдардан бери өзүнүн туулуп-өскөн Баткендеги Көк-Таш айылына өз демилгеси менен ар кандай таризде жардам берип келет. Ал жыл сайын үй-бүлөөсү менен кичи мекенине каттаган сайын айылындагы мектеп жана бала-бакча үчүн финансылык жана материалдык жардамдарды чогулта кетүү менен бирге аялдардын ортосунда футбол турнирин уюштурат. БИЗ уюму Газбүбүнүн демилгелерине акчалай жана материалдык жактан колдоо көрсөтүп келет. Мисалы, 2022-жылдын август айындагы футболдун жеңүүчүлөрү үчүн Гази айымга уюмдун казнасынан 200 Евро жана жергиликтүү журналисттер үчүн атайын техникалык аспаптар алынып берилген.

Оштогу «Кыздар жана айымдар үчүн окутуу борбору»

Башталышы: 15.10.2022
Долбоордун жетекчиси: Асел Сайраан-Дамир
Долбоор ишке ашчу жер: Ош шаары (Кыргызстан)
Долбоор тууралуу: БИЗ уюму Ош шаарында «Кыздар жана айымдар үчүн окутуу борборун» ачууну пландап жатат. Бул борбордо кыздар жана ар кандай жаштагы айымдар үчүн жашоодогу керектүү билимди берген ар кандай курстар берилип, окутуу долбоорлору ишке ашат. Алардын айрымдары БИЗ уюмунун өлкөдөгү өнөктөштөрү РОЗА ОТУМБАЕВАНЫН ДЕМИЛГЕСИ жана ЖЫЛДЫЗ АКАДЕМИЯСЫ менен биргеликте иштелип чыгат.

«Айти стипендия» долбоору

Башталышы: 01.07.2022
Долбоордун жетекчиси: Асел Сайраан-Дамир, Калыгул Жунушбеков, Сейитбек Усманов
Долбоор ишке ашчу жер: Германия/АКШ
Долбоор тууралуу: БИЗ фонду Германияда Ау-Пэр жана FSJ программасы менен келген улан-кыздардын арасында «Айти стипендия» деген конкурс жарыялады. 3 тандалуу баскычынан турган бул жарышка 60 тай адам катышып, алардын 80 пайызын кыздар түздү. Тандалган 20дай киши эссе жазып, алардын бешөө долбоордун жетекчилери менен болгон маекке чакырылды. Жыйынтыгында Франкфуртта FSJ кылган Нуржамал Абдылдаева деген жердешибиз жеңишке ээ болду. Ал немис жана англис тилин C1 деңгээлде сүйлөй алгандыгы жана университеттин Business Informatics факультетин ийгиликтүү аяктагандыгы менен чоң упай топтой алды. Андан тышкары ал ар кандай IT долбоорлорго катышып, бул сферада бир аз тажрыйба дагы топтогон. Нуржамал эми БИЗ уюмунун стипендиаты катары АКШдагы IT-адиси Сейитбек Усмановдун Германиядагы мекендештерге арналган 4-5 айлык Salesforce мектебинде бекер окуп, курсту ийгиликтүү бүтүрсө, сертификат алат. Андан ары программист же консультант же Salesforce администратор болуп иштегенге толук мүмкүнчүлүгү бар.

Студенттер үчүн ментордук долбоор

Башталышы: 15.01.2022
Долбоордун жетекчиси: Канат Ишенбек, Мумтозбек Музаффаров
Долбоор ишке ашчу жер: Германия
Долбоор тууралуу: БИЗ фонду Германияда окуган кыргызстандык студенттер жана ошондой эле кесиптик билим алып жаткандар үчүн менторлук долбоорун баштайт. Бул долбоордун алкагында Германияда иштеген адистер ментор катары жеке тажрыйбаларыбыз менен бөлүшүп, студенттерге ар түрдүү иш-чаралар аркылуу колдоо көрсөтүп, окууну ийгиликтүү аяктоого жардамдашмакчыбыз. Долбоор боюнча кыргыз, орус жана немис тилиндеги жарыяны окуп, биринчи жолугушууну биздин You-Tube-Каналдан көрүп алыңыз.

«Au-Pair Mentoring» долбоору

Башталышы: 10.01.2022
Соңу: 27.08.2022
Долбоордун жетекчиси: Айканыш Рыскулова, Касиет Асекова, Мунара Азимбекова
Долбоор ишке ашчу жер: Германия
Долбоор тууралуу: Германияда көп жылдар бою жашаган мекендештерибиз «Au-Pair Mentoring» долбоору аркылуу Au-Pair программасынын катышуучуларына устат катары жардам беришет. Устаттарды жана шакирттерди сурамжылоо анкетасы аркылуу Au-Pair Community тандап алат. Устат – шакирт тандеми эки тараптын жеке жана кесиптик кызыкчылыгына жараша түзүлөт. Ошондой эле долбоор жүрүп жаткан учурда түрдүү тренингдер жана мамилелерди түзүүгө жана чындоо арналган иш-чаралар пландалган. Долбоордун кыргыз жана орус тилиндеги жарыясын окуп, биринчи жолугушууга катыша албай калган болсоңор, ментор менен байланышка чыгыңыздар.
Ментордук долбоордун максаты: Германиядагы жаштарыбызга жеке жана кесиптик максаттарына жетүүдө консультативдик көмөк көрсөтүү. Болочок Ау-Пэрлерге программа тууралуу реалдуу маалымат таратуу.

Айымдардан айымдарга

Башталыш: 08.03.2021
Долбоордун жетекчиси: Ак-Бермет Богачиева, Нурзада Макеева
Долбоор ишке ашчу жерлер: Германия/Орусия/Америка/Түркие/Кыргызстан
Долбоор тууралуу: Бул долбоор ар кайсыл өлкөдөгү айымдардын уюмдар менен жана айым активисттердин арасында нетворкиң пайда кылууну көздөйт. Долбоордун максаты: Айымдар арасында байланыш түзүү жана келечекте долбоорлорго колдоо көрсөтүү жана биргеликте иш-аракеттерди ишке ашыруу менен кыргыз коомунун өнүгүүсүнө салым кошуу. Жолугушуулар жана форумдар аркылуу пикир алмашуулар болот. Айымдар ар кандай иш-чаралардын негизинде бири-бири менен маданий, адабий, музыкалык тажрыйба алмашууларга ээ болушат.

Балдар үчүн кыргыз тил сабагы

Башталышы: 01.10.2020
Долбоордун жетекчилери: Динара Сулайманова, Айпери Отунчиева, Айнагүл Мамырбаева
Долбоор ишке ашчу жер: Германия/Швейцария/Kыргызстан
Долбоор тууралуу: Биз Германияда жашап жүрүп эмоционалдык жана руханий жактан өз мекенибиз менен байланышта экенибизди жогоруда айтып өттүк. Аны менен бирге, кыргыз тилин балдарыбызга улуттук баалуу байлык катары өткөрүп берүү зарылдыгын сезип жатабыз. Ошол себептен, балдар жана өспүрүмдөр үчүн «Кыргыз тил сабактары» деген эң алгачкы долбоорубуз башталгандан бери ийгиликтүү иштеп келе жатат.